زۆرجار ڕووبەڕووی ئەوە دەبینەوە کە قوتابییەک لە کاتی وانەدا بەشداری دەکات و وەڵامی پرسیارەکان دەداتەوە، بەڵام کاتێک دەگاتە تاقیکردنەوە، ناتوانێت زانیارییەکانی بە دروستی بیر بکەوێتەوە. هۆکارەکە هەمیشە کەمی خوێندن نییە، بەڵکو ڕەنگە قوتابی زانیارییەکانی تەنها لەبەر کردبێ و بە قووڵی تێی نەگەیشتبێت، زانیاریەکانی وەر گرتووە بەڵام بۆ ماوەیەکی کاتی، قووتابی تا کاتی تاقیکردنەوە زانیاریەکانی بەکار دەهێنێت دوای تاقیکردنەوە بیری دەچنەوە وەک ئەوەی هەر فێر نەبووبێت! کەواتە چارەسەر چییە؟
کاتێک قوتابی تەنها پێناسە و وەڵامەکان لەبەر دەکات، ڕەنگە نەتوانێت لە پرسیارێکی نوێدا زانیارییەکانی بەکاربهێنێت. بۆیە گرنگە مامۆستا تەنها داوای لەبەرکردنی زانیاری نەکات، بەڵکو یارمەتی قوتابی بدات بیر بکاتەوە، پرسیار بکات و هۆکاری ڕووداوەکان تێبگات، قوتابی پێویستی بەوە هەیە پەرتووکەکە دابخات و هەوڵ بدات بە زمانی خۆی بابەتەکە ڕوون بکاتەوە، وەڵامی پرسیارەکان بداتەوە و زانیارییەکانی پێشوو دووبارە بکاتەوە، مامۆستا دەتوانێت قووتابی بکات بە سەنتەر لە بەشێکی وانەکەی ڕاوبۆچوونیان هەبێت، بە دڵنیاییەوە ئەکرێت داهێنانیان پێبێت.
لە وانەی زانستدا، پەیوەستکردنی زانیاری بە ژیانی ڕۆژانە ڕۆڵێکی گرنگ دەگێڕێت. کاتێک قوتابی تاقیکردنەوەیەک ئەنجام دەدات، مۆدێلێک دروست دەکات یان دیاردەیەکی سروشتی چاودێری دەکات، دەرفەتی ئەوەی دەبێت زانیارییەکان بە شێوەیەکی مانادارتر تێبگات. ئەمە یارمەتی دەدات فێربوون لە سنووری پەرتووک تێپەڕێت و بە ئەزموونێکی ڕاستەقینە بگۆڕێت. لە لایەکی دیکەوە، نیگەرانی و ترسی تاقیکردنەوە دەتوانێت سەرنج و بیرخستنەوەی قوتابی لاواز بکات. بۆیە مامۆستا دەبێت ژینگەیەکی ئارام دروست بکات کە قوتابی تێیدا هەست بە دڵنیایی بکات و بزانێت هەڵەکردن بەشێکە لە پرۆسەی فێربوون.
لە وایز باوەڕمان وایە ئامانجی فێرکردنی زانست تەنها ئەوە نییە قوتابی وەڵامەکان لەبەر بکات، بەڵکو بتوانێت زانیارییەکان تێبگات، ڕوونیان بکاتەوە و لە بارودۆخی جیاوازدا بەکاریان بهێنێت. بۆ ئەمەش، پێویستە مامۆستا بەردەوام تێگەیشتنی قوتابی هەڵبسەنگێنێت و ڕێگای جیاوازی فێربوون بەکاربهێنێت.
چونکە فێربوونی ڕاستەقینە تەنها لەبەرکردنی زانیاری نییە، بەڵکو تێگەیشتن، بیرکردنەوە و توانای بەکارهێنانییەتی)
