بە کرداری کردنی وانە یەکێکە لە ڕێگاکانی باشترکردنی پڕۆسەی فێرکردن و فێربوون ، لەم وانەیەدا قوتابی تەنها گوێگر نیە ، بەڵکو بەشدارییەکی چالاک لە وانەدا دەکات ، لە ڕێگەی ( گفتوگۆ – گرووپ – پێشبڕکێ – کاری دەستی – یارییە پەروەردەییەکان – ڤیدیۆ – دەربڕینی ڕای خۆی –گەشتی زانستی ....) لە ڕێگەی جێبەجێکردنی چالاکییەکانەوە زانیارییەکانی وانە بە کرداری دەکات ، ئەم شێوازە یارمەتیدەرە بۆ زیادکردنی بەشداری قوتابیان و متمانە بە خۆبوون زیاد دەکات و پەیوەستکردنی وانەکانی خوێندنە بە ژیانی ڕۆژانەوە ، ئێمە لە قوتابخانەی وایز ئامانجی سەرەکیمان ئەوەیە قوتابی ئەوەی فێری بووە لە وانەدا لە ژیانی ڕۆژانەدا بەکاریبهێنێت ، مامۆستا لە وانەکردارییەکانماندا تەنها زانیاری ناگوازێتەوە بەڵکو ڕێبەر و ڕێنمایکاری قوتابیانە .
مامۆستا دەبێت ژینگەیەکی چالاک و خۆش بۆ فێربوون دروست بکات ، پرسیار بۆ قوتابیان دابین بکات و هانیان بدات و بەشدارییەکی چالاک بکەن و چاودێری قوتابیان بکات و ڕێنمای پێویستیان پێشکەش بکات و هەڵسەنگاندن بۆ کارەکانیان بکات و گرنگیەوە لێی بڕوانێت. قوتابی پێویستە لەگەڵ هاوڕێ و هاوپۆلەکانی کار بکات و ئەو زانیاریانەی فێری بووە لە چالاکیەکان و ژیانی ڕۆژانەیدا بەکاری بهێنێت ، لە فێربوونی زانیاری بە خاتری تاقیکردنەوە بیگۆڕیت بۆ کرداری ژیانی ڕۆژانەی . لە کۆتاییدا سەرکەوتنی پرۆسەی پەروەردە و فێربوون تەنها بەگواستنەوەی زانیاری پێوانە ناکرێت ، بەڵکو بە توانای قوتابی لە تێگەیشتن و بەکارهێنان و گۆڕینی ئەو زانیارییە بۆ کردار پێوانە دەکرێت ، لە فێربوونی کرداریدا مامۆستا ڕێبەرە و قوتابی بەشدار و جێبەجێکار ، هاوکاریی نێوان هەردووکیان بناغەی فێربوونێکی کاریگەر و بەردەوامە ، وانەی سەرکەوتوو ئەو وانەیە نیە تەنها قوتابی زانیارییەکەی لەبەر بێت بەڵکو ئەو وانەیە کە بتوانێت فێربوونەکەی لە ژیانی ڕۆژانەدا بە کردار بکات.
